Babala Laban sa Babaing Nakikiapid

1. Anak ko, dinggin mo ang aking mga salita
   at ingatan ang aking mga utos.
2. Sundin mo ang aking mga utos at mabubuhay ka;
   pakaingatan mo ang aking mga turo
   tulad ng mahalagang tau-tauhan ng iyong mga mata.
3. Itali mo ito sa iyong mga daliri;
   iukit mo sa himaymay ng iyong puso.
4. Sabihin mo sa karunungan, "Kapatid kitang babae,"
   ituring mong kamag-anak ang unawa.
5. Ilalayo ka ng mga ito sa babaing mapakiapid,
   mula sa asawang taksil at may mapang-akit na mga salita.
6. Ako’y dumungaw sa bintana ng aking bahay at ako’y nagmasid.
   
7. Natanaw ko ang mga kabataang lalaki
   at napansin ko ang isang walang muwang.
8. Naglalakad ito patungo sa lansangang malapit sa kanto,
   papunta sa bahay ng babae
9. nang magdadapit hapon, habang palubog ang araw,
   at nasisimula nang dumilim.
   
10. May lumabas na babae at siya’y sinalubong,
    nakadamit ng patutot at may masamang hangad.
11. (Siya ay masagwa at naghahamon, hindi matigil ng bahay.
12. Ngayo’y nasa kalye, mayamaya’y nasa plasa,
    nag-aabang sa lahat ng kanto.)
13. Hinawakan niya ang lalaki at hinagkan
    at di nahihiya ang mukhang sinabi:
14. "Mayroon akong mga handog pangkapayapaan sa aking tahanan;
    tinupad ko ngayon ang mga panata ko.
15. Kaya lumabas ako para salubungin ka.
    Hinanap kita at nasumpungan naman.
16. Ang aking higaan ay binalot ko ng makukulay na lino mula sa Egipto.
17. Ang higaan ko’y binusan ko ng pabangong mira, aloe at cinamon.
18. Halika magpakalunod tayo
    sa tamis ng pag-ibig hanggang umaga,
    magpasasa tayo sa pagmamahalan!
19. Wala sa amin ang aking asawa;
    naglakbay siya sa malayong dako.
20. Nagdala siya ng maraming pera
    at sa kabilugan pa ng buwan ang kanyang balik."
    
21. Sa mapang-akit na salita’y nailigaw niya ang lalaki;
    sa matatamis na pananalita, ito ay kanyang natukso.
22. Bigla siyang sumunod sa babae,
    tulad ng isang bakang dinadala sa patayan,
23. parang usang natapat sa patibong
    hanggang sa maglagos ang palaso sa kanyang atay;
    parang ibong sumisisid sa bitag,
    walang kamalay-malay na buhay niya ang katumbas.
    
24. Kaya nga, mga anak, pakinggan ninyo ako,
    pag-ukulan ng pansin ang aking sinasabi.
25. Huwag ninyong pabayaang ang puso ninyo’y
    bumaling sa kanyang mga daan,
    ni maligaw sa kanyang mga landas.
26. Marami na siyang biktimang nailugmok;
    hindi na mabilang ang kanyang naipahamak.
27. Ang bahay niya ay daan patungong libingan,
    nagbubulid sa mga silid ng kamatayan.