| |
Mga Kawikaan ni Solomon
- Ang umiibig sa disiplina ay umiibig sa kaalaman,
ngunit ang namumuhi sa pagtutuwid ay hangal.
- Ang mabuting tao ay nagtatamo ng kaluguran mula sa Panginoon,
ngunit hinahatulan ng Panginoon ang taong tuso.
- Ang tao’y hindi magiging matatag sa pamamagitan ng kasamaan,
ngunit ang matuwid ay hindi mabubuwal.
- Ang babaing may marangal na ugali ay putong ng kanyang asawa,
ngunit ang babaing walang dangal ay kabulukan sa kanyang buto.
- Ang mga balak ng matuwid ay makatarungan,
ngunit ang payo ng masama ay magdaraya.
- Ang mga salita ng masama ay nag-aabang sa dugo,
ngunit ang pananalita ng matuwid ay magliligtas sa kanila.
- Ang mga taong masama ay nalilipol at nawawala,
ngunit ang sambahayan ng matuwid ay nakatindig nang matatag.
- Pinupuri ang tao ayon sa kanyang karunungan,
ngunit ang may masamang pag-iisip ay kinamumuhian.
- Higit na mabuti ang hindi kilala ngunit may utusan,
kaysa nagkukunwang malaking tao ngunit wala namang makain.
- Ang matuwid ay kumakalinga sa pangangailangan ng kanyang mga hayop,
ngunit ang pinakamabuting gawa ng masama ay kalupitan.
- Siyang nagbubungkal ng kanyang lupa ay magkakaroon ng saganang pagkain,
ngunit siyang nangangarap lamang ay walang unawa.
- Ang masama ay nag-iimbot sa samsam ng masasamang tao,
ngunit ang ugat ng matuwid ay nananagana.
- Ang taong masama ay nasisilo ng makasalanan niyang salita,
ngunit ang taong matuwid ay naliligtas sa kaguluhan.
- Mula sa bunga ng kanyang mga labi, ang isang tao’y nabubusog ng mabubuting
bagay,
kung paanong ginagantimpalaan siya ng gawa ng kanyang mga kamay.
- Ang lakad ng mangmang ay matuwid sa sariling paningin,
ngunit ang taong pantas ay nakikinig sa payo.
- Madaling mahalata ang galit ng mangmang,
ngunit ang taong mahinahon ay hindi pumapansin sa paghamak sa kanya.
- Ang tapat na saksi ay nagbibigay ng tapat na patotoo,
ngunit ang sinungaling na saksi ay nagsasabi ng kasinungalingan.
- Ang mga salitang walang pakundangan ay tulad ng isang tabak
ngunit ang dila ng marunong ay nagdudulot ng kagalingan.
- Ang tapat na mga labi ay mananatili magpakailanman,
ngunit ang sinungaling na dila ay hindi magtatagal.
- May karayaan sa mga puso ng mga taong nagbabalak ng masama,
ngunit galak ang nadarama ng nagbubunsod ng kapayapaan.
- Walang kapahamakang babagsak sa matuwid
ngunit ang masasama ay mapupuno ng kaguluhan.
- Ang mga labing sinungaling ay kinasusuklaman ng Panginoon
ngunit nalulugod siya sa mga taong tapat.
- Ang kaalaman ng matalino’y iniingatan niya sa sarili,
ngunit ang puso ng mangmang ay naghahayag ng kamangmangan.
- Mamamahala ang masikap na mga kamay
ngunit ang katamaran ay magwawakas sa pagiging alipin.
- Ang balisa ng puso ay nagpapalupaypay sa tao,
ngunit siya’y pinaliligaya ng isang magandang salita.
- Ang taong matuwid ay maingat sa pakikipagkaibigan,
ngunit ang daan ng masama ay nagwawakas sa pagkaligaw.
- Ang taong tamad ay di nagluluto ng kanyang huli
ngunit ang taong masikap ay nagpapahalaga sa kanyang ari-arian.
- Sa daan ng katuwiran ay mayroong buhay;
kaagapay ng landas na ito ang kawalang-kamatayan.
|