| |
Mga Kawikaan ni Solomon
- Ang pantas na anak ay sumusunod sa payo ng kanyang ama,
ngunit ang mapanglibak ay di nakikinig sa saway sa kanya.
- Mula sa bunga ng kanyang mga labi, ang tao’y nasisiyahan sa mabubuting bagay,
ngunit ang di tapat ay nagnanasa ng karahasan.
- Siyang nagbabantay sa kanyang mga labi ay nagbabantay sa kanyang kaluluwa,
ngunit ang walang taros magsalita ay hahantong sa pagkawasak.
- Ang tamad ay naghahangad ngunit walang nakakamtan,
ngunit ang mga hangarin ng masikap ay magkakaroon ng lubos na kasiyahan.
- Ang matuwid ay namumuhi sa kasinungalingan,
ngunit ang masama ay nagdudulot ng kahihiyan at kadustaan.
- Ang taong tapat ay binabantayan ng katuwiran
ngunit ang kasamaan ang nagbabagsak sa makasalanan.
- May taong nagpapanggap na mayaman ngunit ang totoo’y dukha lamang,
mayroon namang nagpapanggap na mahirap ngunit ubod ng yaman.
- Maaaring matubos ng tao ang kanyang buhay sa pamamagitan ng kanyang kayamanan,
ngunit sa mahirap na tao’y walang nagbabantang sinuman.
- Ang luningning ng taong matuwid ay nagliliwanag na mabuti,
ngunit ang ilawan ng masasama ay namamatay.
- Ang paghahambog ay nanganganak lamang ng mga pag-aaway
ngunit karunungan ang nakikita sa mga tumatanggap ng payo.
- Ang salaping buhat sa masama ay madaling nauubos,
ngunit siyang nagtitipong unti-unti ay nagpapalago nito.
- Ang pag-asang nabalam ay nagdudulot sa puso ng karamdaman,
ngunit ang inaasam na natupad ay isang punungkahoy ng buhay.
- Ang humahamak sa aral ay magbabayad balang araw,
ngunit ang gumagalang sa utos ay gagantimpalaan.
- Ang katuruan ng marunong ay bukal ng buhay,
naglalayo sa tao sa mga patibong ng kamatayan.
- Ang magandang pang-unawa ay umaakit ng kaluguran,
ngunit ang daan ng hindi tapat ay batbat ng kahirapan.
- Ang matalinong tao ay kumikilos ayon sa kanyang kaalaman,
ngunit inihahayag ng mangmang ang kanyang kamangmangan.
- Ang masamang mensahero ay humahantong sa kaguluhan,
ngunit ang mapagtitiwalaang sugo ay nagdadala ng kagalingan.
- Ang nagwawalang-bahala sa pagtutuwid ay nasasadlak sa kahirapa’t kahihiyan,
ngunit ang tumatanggap ng pagtutuwid ay pinararangalan.
- Ang isang hangaring natupad ay matamis sa kaluluwa,
ngunit kinasusuklaman ng mga mangmang ang paglayo sa masama.
- Ang sumasama sa lakad ng matatalino ay nagiging matalino,
ngunit ang kasamahan ng mga mangmang ay nagdaranas ng kapahamakan.
- Ang kasamaang-palad ay humahabol sa makasalanan
ngunit ang gantimpala ng matuwid ay kaunlaran.
- Ang mabuting tao’y nag-iiwan ng mana sa kanyang mga apo,
ngunit ang kayamanan ng mangmang ay nalalaan sa matuwid.
- Ang bukirin ng dukha ay maaaring mag-ani ng saganang pagkain,
ngunit ang kawalang katarungan ang pumapalis dito.
- Siyang hindi gumagamit ng pamalo ay namumuhi sa kanyang anak,
ngunit ang nagmamahal sa anak ay masikap na nagtutuwid dito.
- Ang mga matuwid ay kumakaing may kasiyahan ang puso,
ngunit ang tiyan ng masama ay nananatiling gutom.
|