| |
Mga Kawikaan ni Solomon
- Ang banayad na sagot ay nakapapawi ng poot,
ngunit ang marahas na salita ay lumilikha ng galit.
- Ang dila ng matalino ay pumupuri sa karunungan,
ngunit ang bibig ng mangmang ay nagbubuga ng kahangalan.
- Nakatingin ang Panginoon sa lahat ng dako,
lagi siyang nakabantay sa masasama at mabubuting tao.
- Ang dilang naghahatid ng kagalingan ay punungkahoy ng buhay,
ngunit dumudurog ng espiritu ang dilang mapanlinlang.
- Ang pagtutuwid ng kanyang ama ay tinatanggihan ng mangmang,
ngunit ang nakikinig sa payo’y nagpapakita ng kahinahunan.
- Ang tahanan ng taong matuwid ay naglalaman ng maraming kayamanan,
ngunit ang kinikita ng masasama ay nagdudulot sa kanila ng kaguluhan.
- Ang mga labi ng marunong ay nagkakalat ng karunungan,
di gayon ang puso ng mga mangmang.
- Kinasusuklaman ng Panginoon ang hain ng masasama,
ngunit nalulugod siya sa dalangin ng mga matuwid.
- Nasusuklam ang Panginoon sa daan ng masama,
ngunit iniibig niya ang mga sumusunod sa katuwiran.
- Mahigpit na disiplina ang naghihintay sa mga lumilihis ng daan,
ang namumuhi sa pagtutuwid ay mamamatay.
- Nalalantad sa harapan ng Panginoon ang Kamatayan at Pagkawasak—
gaano pa kaya ang puso ng mga tao!
- Ang manlilibak ay nagagalit sa pagtutuwid;
hindi siya sasangguni sa matalino.
- Ang maligayang puso ay nagpapasaya sa mukha,
ngunit ang kirot ng puso ay dumudurog sa espiritu.
- Ang pusong may unawa ay humahanap ng karunungan
ngunit ang bibig ng mangmang ay nabubuhay sa kamangmangan.
- Ang inaapi ay kahabag-habag sa lahat ng araw,
ngunit ang masayang puso ay patuloy na nagdiriwang.
- Mabuti pa ang kaunting kabuhayan ngunit may takot sa Panginoon,
kaysa malaking kayamanan na puno ng kaguluhan.
- Mabuti pa ang pagkaing gulay na puno ng pagmamahal,
kaysa pinatabang guyang batbat ng kapootan.
- Ang taong mainit ang ulo ay lumilikha ng pag-aaway,
ngunit ang taong mapagtimpi ay pumapayapa ng kagalitan.
- Ang daan ng taong tamad ay puno ng tinik,
ngunit ang daan ng matuwid ay landas na malinis.
- Galak ang dulot sa ama ng matalinong anak,
ngunit ang taong mangmang, sa ina ay humahamak.
- Ang taong kulang ng pagpapasiya ay nasisiyahan sa kamangmangan,
ngunit ang taong may pang-unawa ay nananatili sa tuwid na daan.
- Ang mga balak ay nabibigo dahil sa walang nagpapayo,
ngunit magtatagumpay sila kung maraming tagapayo.
- Ang tao’y nakasusumpong ng kagalakan sa pagbibigay ng wastong sagot—
at pagkabuti ng isang salitang binitiwan sa panahong angkop!
- Para sa marunong, ang daan ng buhay ay pataas,
upang maglayo sa kanya sa paglusong sa hukay.
- Winawasak ng Panginoon ang bahay ng palalo,
ngunit ang hanggahan ng balo’y pinananatiling buo.
- Kinasusuklaman ng Panginoon ang iniisip ng masasama,
ngunit nalulugod siya sa malinis na isipan.
- Naghahatid ng gulo sa sambahayan ang taong matakaw,
ngunit siyang namumuhi sa mga suhol ay mabubuhay.
- Ang puso ng taong matuwid ay tumitimbang sa kanyang mga kasagutan,
ngunit ang bibig ng masama ay nagbubuga ng kasamaan.
- Ang Panginoon ay malayo sa masasama,
ngunit ang dalangin ng mga matuwid ay kanyang dinidinig.
- Ang masayang tingin ay nagdudulot ng kagalakan sa puso,
at ang magandang balita ay nagdadala ng kalusugan sa mga buto.
- Ang nakikinig sa saway na nagbibigaybuhay,
sa pulutong ng marurunong ay may kapanatagan.
- Ang nagwawalang-bahala sa pagtutuwid, sa sarili ay namumuhi,
ngunit nagtatamo ng unawa ang nakikinig sa pagtutuwid.
- Ang pagkatakot sa Panginoon ay nagtuturo ng karunungan,
at unang dumarating ang kababaan bago ang karangalan.
|