Mga Salawikain ng Pantas

1. Huwag ninyong kainggitan ang masasamang tao,
   huwag ninyong hangaring makisama sa kanila;
2. pagkat ang mga puso nila’y nagbabalak ng karahasan,
   at ang pinag-uusapan nila’y ang gagawing kaguluhan.
   
3. Sa karununga’y natatayo ang isang bahay,
   at sa pamamagitan ng pang-unawa ito ay natatatag;
4. sa pamamagitan ng karunungan,
   ang mga silid nito ay napupuno
   ng di karaniwan at magagandang kayamanan.
5. Ang marunong na tao’y may malaking kapangyarihan,
   at ang taong may kaalaman ay nagdaragdag ng kalakasan;
6. sa pakikipagbaka, kailangan ang patnubay
   at maraming tagapayo para magtagumpay.
7. Para sa isang mangmang, masyadong mataas ang karunungan;
   wala siyang masasabi sa kalipunan sa may pintung-pasukan.
   
8. Ang nagbabalak ng masama
   ay makikilalang tagapagbalak.
9. Ang mga balak ng kamangmangan ay kasalanan,
   at ang mga tao’y nasusuklam sa mga manlilibak.
   
10. Kapag naghihina ka sa panahon ng kaguluhan,
    napakaliit ng iyong kalakasan.
11. Iligtas ninyo ang mga inaakay tungo sa kamatayan;
    pigilan ninyo ang mga sumusuray patungong patayan.
12. Kung sasabihin ninyo, "Wala kaming alam sa bagay na ito,"
    hindi ba siyang tumitimbang ng puso ang nakaaalam nito?
    Hindi ba niya pagbabayarin ang bawat isa ayon sa kanyang ginawa?
    
13. Anak ko, kumain ka ng pulut-pukyutan, sapagkat ito ay mabuti;
    ang pulot buhat sa bahay ng pukyutan ay matamis kung iyong tikman.
14. Alamin mo rin na ang karunungan ay matamis sa iyong kaluluwa;
    kung masumpungan mo ito, may pag-asa ka sa kinabukasan,
    at ang pag-asa mo’y hindi mapaparam.
    
15. Huwag kang mag-aabang na parang tulisan laban sa tahanan ng taong matuwid,
    huwag mong sasalakayin ang kanyang tirahan;
16. pagkat pitong beses mang bumagsak ang taong matuwid, tumatayo uli siya,
    ngunit ang masasama ay ibabagsak sa pamamagitan ng sakuna.
    
17. Huwag mong ikagagalak ang pagbagsak ng iyong kaaway;
    huwag magagalak kung siya ay mabuwal,
18. makikita ito ng Panginoon at di siya sasang-ayon
    at hindi na siya magagalit sa kanya.
    
19. Huwag mong katakutan ang masasamang tao
    o mainggit man sa masasama,
20. pagkat ang masamang tao ay walang pag-asa sa hinaharap,
    at papatayin ang ilaw ng masasama.
    
21. Anak ko, matakot ka sa Panginoon at sa hari,
    at huwag kang sasama sa mapaghimagsik,
22. pagkat silang dalawa ay biglang magpapadala ng pagkawasak sa sarili nila,
    at sino ang nakababatid sa mga sakunang kanilang madadala?

Iba Pang Salawikain ng Pantas

23. Ito pa ang mga salawikain ng Marunong:
    Ang paghatol na may pagtatangi ay hindi mabuti;
24. Sinumang magsabi sa nagkasala, "Wala kang kasalanan"—
    susumpain siya ng mga tao at tutuligsain ng mga bansa.
25. Ngunit mapapabuti ang mga humahatol sa nagkasala,
    at ang masaganang pagpapala ay darating sa kanila.
26. Ang tapat na sagot
    ay tulad ng isang halik sa mga labi.
27. Tapusin mo ang iyong gawain sa labas
    at ang mga bukid mo ay ihanda;
    pagkatapos, itayo mo ang iyong bahay.
    
28. Huwag kang sasaksi laban sa iyong kapwa nang walang dahilan,
    o gamitin kaya ang iyong mga labi para manlinlang.
29. Huwag mong sasabihin ,
    "Gagawin ko sa kanya ang ginawa niya sa akin.
    Gaganti ako sa kanya sa ginawa niya sa akin."
    
30. Dumaan ako sa bukid ng isang tamad,
    dumaan ako sa ubasan ng isang taong walang sapat na pagpapasiya;
31. mga tinik ang nagkalat sa bawat dako,
    ang lupa’y lipos ng mga damo, at guho ang pader na bato.
32. Iniugnay ko sa aking puso ang aking nasaksihan
    at sa aking nakita, isang aralin ang natutuhan:
33. Kaunting tulog, kaunting idlip,
    sandaling paghalukipkip ng mga kamay para mamahinga—
34. at parang mandarambong na darating sa ‘yo ang kahirapan.