| |
Mga Salawikain ni Haring
Lemuel
- Ito ang mga salawikain ni Haring Lemuel—isang pahayag na itinuro ng kanyang
ina:
- "Anak ko na bunga ng aking sinapupunan, anak dahil sa aking mga pangako,
- huwag mong aksayahin ang iyong lakas sa mga babae,
ang iyong sigla sa mga nagpapahamak sa mga hari.
- "Hindi dapat sa mga hari, O Lemuel—
hindi dapat sa mga namamahala na mahumaling sa serbesa,
- baka sa pag-inom nila’y makalimutan ang itinatadhana sa kautusan,
at mapagkaitan ng karapatan ang lahat ng inapi.
- Ang serbesa’y ibigay ninyo sa mga papanaw na,
ang alak ay doon ibigay sa nagdadalamhati;
- bayaan silang uminom upang malimutan ang kanilang kahirapan
at di na magunita ang kanilang kalungkutan.
- "Magsalita ka para sa mga di makapagsalita ukol sa kanilang sarili,
para sa karapatan ng lahat ng maralita.
- Magsalita ka at humatol nang pantay;
ipagtanggol mo ang karapatan ng mga dukha’t nangangailangan."
Pangwakas: Ang Asawang may Dakilang Ugali
- Ang asawang may magandang ugali, sino ang makasusumpong?
Higit siyang mahalaga kaysa mga rubi.
- Lubos ang pagtitiwala sa kanya ng kanyang asawa
hindi magkukulang ng anumang may halaga,
- ang dinadala niya sa asawa ay mabuti, hindi nakasasakit,
sa lahat ng araw ng kanyang buhay.
- Pumipili siya ng lana at de-ilo
at pinagyayaman ng masipag niyang mga kamay.
- Tulad siya ng mga barkong pangalakal,
na nagdadala ng kanyang pagkain mula sa malayo.
- Madilim pa’y bumabangon na siya;
naghahanda siya ng pagkain para sa kanyang sambahayan
at mga bahagi para sa mga katulong na mga babae.
- Isinasaalang-alang niya ang isang bukirin at binibili ito;
buhat sa kanyang kinita’y nagtatanim siya ng ubasan.
- Inihahanda niya ang kanyang gawain na may kasiglahan;
ang mga bisig niya’y may sapat na lakas para sa kanyang mga gawain.
- Tinitiyak niya na may mapapakinabang sa kanyang hanap-buhay,
patuloy na nagniningas ang kanyang ilaw sa buong magdamag.
- Siya ang gumagawa ng kanyang sinulid at humahabi ng kanyang damit.
- Bukas ang kanyang mga palad sa mahihirap,
at tumutulong sa mga nangangailangan.
- Kung umuulan ng niyebe, wala siyang pangamba tungkol sa kanyang sambahayan;
pagkat silang lahat ay nararamtan ng granate.
- Siya ang gumagawa ng mga pantakip sa kanyang kama;
siya’y nararamtan ng mainam na lino at kulay murado.
- Ang asawa niya’y iginigalang sa pintuan ng lunsod,
na doo’y nauupong kasama ng matatanda sa lupain.
- Gumagawa siya ng mga kasuotang lino, at ipinagbibili,
at siya ang nagtutustos ng sintas sa mga mangangalakal.
- Taglay niya ang lakas at karangalan;
maaaring tawanan niya ang mga araw na darating.
- Nagsasalita siyang may karunungan,
at tapat na aral ang nasa kanyang dila.
- Siya ang sumusubaybay sa mga gawain ng kanyang sambahayan
at hindi siya kumakain ng tinapay ng katamaran.
- Bumabangon ang kanyang mga anak at tinatawag siyang mapalad;
gayon din ang kanyang asawa at pinupuri siya;
- "Maraming babae ang gumagawa ng mga dakilang bagay,
ngunit higit ka sa kanilang lahat."
- Ang panghalina ay nakalilinlang, at ang kagandahan ay lumilipas;
ngunit ang babaing may takot sa Panginoon ay dapat na purihin.
- Ipagkaloob ang gantimpala na nararapat sa kanya,
at bayaang umani ng papuri ang kanyang mga gawa
sa may pintuan ng lunsod.
|