1. Panginoon, huwag mo akong pagwikaan
   kapag ikaw’y nagagalit
   o parusahan man sa iyong pagkapoot.
2. Mahabag ka sa akin, Panginoon,
   pagkat ako ay mahina.
   Pagalingin mo ako, Panginoon,
   pagkat nagdurusa ang aking mga buto.
3. Ang kaluluwa ko’y nagdadalamhati.
   Hanggang kailan, Panginoon,
   hanggang kailan?
4. Lumingon ka, Panginoon, at iligtas ako;
   iligtas mo ako alang-alang sa pag-ibig
   mong hindi nagkukulang.
5. Hindi ka na maaalaala
   ng taong patay na.
   Sino pa’ng pupuri sa iyo
   mula sa libingan?
6. Nanlulupaypay na ako
   dahil sa hinagpis;
   sa buong magdamag,
   ang higaan ko’y tigmak ng luha.
7. Ang mga mata ko’y nanlalabo
   dahilan sa lungkot;
   sinapit ko ito dahilan
   sa aking mga kaaway.
8. Layuan ninyo ako, lahat
   kayong gumagawa ng masama,
   pagkat dininig na ng Panginoon
   ang aking pagtangis.
9. Narinig na ng Panginoon
   ang paghingi ko ng kahabagan;
   tinanggap na ng Panginoon
   ang aking dalangin.
10. Sana’y mapahiya at masindak
    ang lahat kong kaaway;
    sana’y mapaurong sila
    sa biglang kahihiyan.

(NPV)