1. Buong-puso kitang pupurihin, O Panginoon;
   ibabalita ko ang lahat ng iyong kahanga-hangang mga gawa.
2. Magagalak ako at magsasaya sa iyo.
   Aawit ako ng pagpupuri sa iyong pangalan, O Kataastaasan.
3. Umuurong ang aking mga kaaway;
   madarapa sila at mawawala sa iyong harapan.
4. Pagkat pinagtibay mo ang karapatan ko at ang aking layunin;
   naupo ka na sa iyong trono, at matuwid na humahatol.
5. Pinagwikaan mo ang mga bansa at winasak ang mga masasama;
   binura mo na magpakailanman ang kanilang pangalan.
6. Walang wakas ang pagkawasak na dumating sa kaaway,
   binunot mo na ang mga lunsod nila;
   pati alaala sa kanila ay naparam.
7. Maghahari ang Panginoon magpakailanman.
   Itinayo na niya ang kanyang trono para sa paghatol.
8. Hahatulan niya ang daigdig sang-ayon sa katuwiran;
   pamamahalaan niyang may katarungan ang mga tao.
9. Ang Panginoon ay kanlungan ng mga naaapi,
   isang muog sa panahon ng kaguluhan.
10. Magtitiwala sa iyo ang nakababatid ng iyong pangalan,
    pagkat kailan man, Panginoon, ay di mo itinatakwil
    ang sinumang humahanap sa iyo.
11. Awitan ng papuri ang Panginoong nakaluklok sa trono sa Sion;
    ipahayag sa mga bansa ang lahat niyang mga gawa.
12. Sapagkat naaalaala ng mga tagapaghiganti ng dugo;
    hindi niya ipinagwawalang-bahala ang taghoy ng mga nagdurusa.
13. O Panginoon, tingnan mo kung paano ako inuusig ng mga kaaway!
    Kahabagan mo ako at hanguin sa mga pintuan ng kamatayan
14. upang maipahayag ko ang mga kapurihan mo
    sa mga pintuang-daan ng Anak ng Babae ng Sion
    at doon ay magdiwang sa iyong pagliligtas.
15. Nahulog ang mga bansa sa balon na kanilang hinukay;
    sa lambat nilang iniumang nahuli ang kanilang mga paa.
16. Ang Panginoon ay kilala sa pagiging makatarungan;
    ang masasama ay nabitag ng gawa ng kanilang mga kamay.
    Pagbubulay. Selah.
    
17. Ang masasama’y nagbabalik sa libingan,
    lahat ng bansang nakalilimot sa Dios.
18. Ngunit ang mga dukha’y di laging malilimutan,
    at ang pag-asa ng mga nagdurusa ay di mapaparam.
19. Tumindig ka, Panginoon,
    at huwag mong itulot na ang tao’y magtagumpay;
    hatulan mo ang bansa sa iyong harapan.
20. Hampasin mo sila sa pamamagitan ng pagkasindak, O Panginoon;
    ipabatid mo sa mga bansa na sila’y tao lamang.

(NPV)