1. Dios ko, Dios ko, bakit mo ako pinabayaan?
   Bakit ka lumayo sa pagliligtas sa akin;
   kay layo mo para marinig ang aking pagdaing?
2. O Dios ko, dumaraing ako kung araw,
   ngunit di ka sumasagot,
   at kung gabi, di rin ako matahimik.
3. Ngunit nasa trono ka bilang Isa na Banal;
   ikaw ang pinupuri ng Israel.
4. Sa iyo naglagak ng tiwala ang aming mga ninuno;
   nagtiwala sila at iyong iniligtas.
5. Dumaing sila sa iyo at sila’y naligtas;
   nagtiwala sila sa iyo at hindi nabigo.
6. Ngunit ako’y isang uod at di isang tao,
   hinahamak ng mga lalaki at kinukutya ng mga tao.
7. Nilalait ako ng lahat ng makakita sa akin;
   dinudusta nila ako, at iiling-iling pa ang mga ulo.
8. "Nagtitiwala siya sa Panginoon;
   bayaang iligtas siya ng Panginoon.
   Bayaang siya’y iligtas niya,
   yamang nalulugod siya sa kanya."
9. Gayunma’y inilabas mo ako mula sa bahay-bata;
   tunuruan mo akong magtiwala sa iyo
   mula pa sa dibdib ng aking ina.
10. Mula pa sa pagsilang, inilaan na ako sa iyo;
    nasa bahay-bata pa ako ng aking ina,
    ikaw na ang aking Dios.
11. Huwag kang lumayo sa akin,
    sapagkat malapit ang kaguluhan
    at walang ibang tutulong sa akin.
12. Maraming torong nakapalibot sa akin;
    malalakas na toro ng Basan ang nakapaligid sa akin.
13. Mga leong umuungal na lumalapa sa kanilang huli,
    nagbuka ng kanilang mga bibig laban sa akin.
14. Ako’y ibinuhos na animo’y tubig,
    ang mga buto ko’y nalinsad na lahat.
    Ang puso ko’y naging parang pagkit
    na natunaw sa aking dibdib.
15. Ang lakas ko’y natuyo na,
    tulad ng basag na palayok.
    Dumidikit ang dila ko sa aking ngala-ngala;
    inihiga mo ako sa abo ng kamatayan.
16. Pinaligiran ako ng mga aso;
    kinubkob ako ng pangkat ng masasamang tao;
    ang mga kamay ko at paa ay kanilang sinaksak.
17. Ang aking mga buto ay mabibilang kong lahat;
    mga tao’y nakatitig sa akin,
    mga mata’y nandidilat.
18. Hinahati-hati nila ang aking kasuotan
    at ang damit ko’y pinagsapalaran.
19. Ngunit ikaw, O Panginoon, huwag mo akong layuan;
    O aking Lakas, lumapit ka agad at ako’y tulungan.
20. Iligtas mo sa tabak ang aking buhay,
    ang mahalaga kong buhay mula sa lakas ng mga aso.
21. Sa bibig ng mga leon, iligtas mo ako;
    iligtas sa mga sungay ng maiilap na toro.
22. Ipapahayag ko sa mga kapatid ko ang iyong pangalan;
    sa loob ng kapulungan aking papupurihan.
23. Kayong may takot sa Panginoon, magpuri sa kanya;
    lahat ng angkan ni Jacob, siya’y papurihan.
    Igalang ninyo siya, ninyong lahat ng angkan ng Israel!
24. Sapagkat hindi niya hinamak o kinamuhian
    yaong nagdaranas ng kahirapan;
    hindi niya ikinubli ang mukha niya sa kanya;
    sa halip ay dininig ang paghingi niya ng tulong.
25. Sa iyo nagmumula ang pagpupuri ko sa dakilang kapulungan;
    tutupadin ko ang aking mga pangako
    sa harapan ng mga may takot sa iyo.
26. Ang dukha’y kakain at masisiyahan;
    pupurihin siya ng mga humahanap sa Panginoon—
    nawa ang puso mo’y mabuhay magpakailanman!
27. Lahat ng nilalang sa buong daigdig
    ay makaaalaala at magbalik-loob sa Panginoon.
    Lahat ng sambahayan sa mga bansa
    ay yuyukod at sasamba sa kanya,
28. sapagkat ang pamamahala ay sa Panginoon
    at siya ang maghahari sa lahat ng bansa.
29. Lahat ng mayaman dito sa lupa ay magpipista at sasamba;
    lahat ng namayapa na ay maninikluhod sa kanyang harapan—
    silang mga tao na ang sarili’y di mapanatiling buhay.
30. Ang buong lahi ay maglilingkod sa kanya;
    ang tungkol sa Panginoon ay ibabalita
    sa susunod na mga lahi.
31. Ipapahayag nila ang kanyang katuwiran
    sa mga taong di pa isinisilang
    pagkat ito’y ginawa na niya.

(NPV)