Awit para sa pagtatalaga ng templo ni David

1. Itatanyag kita, O Panginoon,
   sapagkat hinango mo ako mula sa kalaliman
   at di mo itinulot na pagtawanan ako
   ng aking mga kaaway.
2. O Panginoon kong Dios, tinawagan kita
   at ako’y humingi ng tulong,
   at pinagaling mo ako.
3. O Panginoon, hinango mo ako mula sa libingan;
   iniiwas mo ako para hindi mahulog sa hukay.
4. Umawit kayo sa Panginoon, kayong mga banal niya;
   purihin ang kanyang banal na pangalan.
5. Sapagkat sandali lamang ang kanyang galit,
   ngunit ang kagandahang-loob niya’y nananatili magpakailanman;
   ang pagtangis ay maaaring tumagal nang magdamag,
   ngunit ang kagalaka’y dumarating pagsapit ng umaga.
6. Pag nakadadama ako ng kapanatagan,
   sinasabi ko, "Hindi ako mayayanig kahit kailan."
7. O Panginoon, nang kalugdan mo ako,
   pinatatag mo ang aking bundok;
   ngunit nang ikukubli mo ang iyong mukha,
   ako ay nasiphayo.
8. Sa iyo, O Panginoon, tumatawag ako,
   dumaing ako sa Panginoon para kahabagan:
9. "Sa aking pagkawasak, anong pakikinabangin
   sa pagbaba ko sa hukay?
   Pupurihin ka ba ng alikabok?
   Ipahahayag ba nito ang iyong katapatan?
10. Dinggin mo, Panginoon at mahabag ka sa akin;
    ikaw ang tumulong sa akin, O Panginoon."
11. Pinalitan mo ng pagsayaw ang aking pagtangis;
    ang suot kong sako ay pinalitan mo ng damit ng kagalakan,
12. upang umawit ang puso ko at di manahimik.
    O Panginoon kong Dios,
    pasasalamatan kita magpakailanman.

(NPV)